උපවාස මාසයේදී විශේෂ අවධානය යොමු විය යුතු කරුණු (Points to be taken into consideration during the month of fasting)

රමළාන් නොහොත් උපවාස මාසය කෙටි කාලයක් තුලදී වැඩියෙන් කුසල් රැස්කරගැනීම සඳහා ලැබී ඇති සුවිශේෂී මාසයකි. මෙවැනි මාසයක් ව්‍යාපාරිකයින්ට ලැබී තිබුනේ නම් ඔවුන් එම මාසය තුලදී හැකි තරම් ලාභ උපයාගැනීමට යුහුසුළු වනු ඇත. 
අල් කුරානයේ සඳහන් පරිදි උපවාසය ලබා දී ඇත්තේ අපගේ තක්වාව වර්ධනය කර ගැනීමටය. තක්වා යන්නට ලබා දී ඇති අර්ථ දැක්වීම් වලින් එකක් වන්නේ අල්ලාහු තආලාගේ නියෝග හැකිපමනින් ඉටු කිරීමත් ඔහු තහනම් කළ දේවල් වලින් හැකිපමනින් අල්ලාහු තආලාගේ තෘප්තිය උදෙසා වැලකී සිටීමත්ය. මෙය සාර්ථකව ඉටු කළ හැක්කේ හොඳ-නරක පිලිබඳ නිසි දැනුමක් තිබීමෙන් ය. මේ සම්බන්දයෙන් අල් කුරානයේ පහත දැක්වෙන පරිදි සඳහන් කොට ඇත.
“අල්ලාහ්ගේ ගැත්තන්ගෙන් ඔහුට බිය වන්නේ උගතුන්මය” (කුරානය 35:28).
ඉහත සඳහන් වගන්තිය රමළාන් මාසය වෙනුවෙන් පහළ නොවුවත් එය සෑම විටම අවශ්‍ය වැකියකි. දැනුම ඇති තැනැත්තා අල්ලාහ්ට බිය බැති කමින් ජිවත් වනවා පමණක් නොව ඔහු කරන සෑම දෙයක්ම අල්ලාහු තආලාගේ නියෝග පිලිපදිම්න් සිදු කරනු ඇත. ඒ අනුව දහම ගැන අවබෝදයක් ඇති තැනැත්තාට ඔහු කරන සෑම ක්‍රියාවක්ම ඉබාදතයක් බවට පරිවර්තනය කර ගත හැකි වන්නේය. සාතන්ට වඩා පහසුවෙන් නොමග යැවිය හැක්කේ දහම් දැනුම නොමැති කෙනාවය. ඒ අතරම ඔහුට නොමග යැවීමට ඉතා දුෂ්කර වන්නේ දහම ගැන දැනුම ඇති තැනැත්තන් ය.
බොහෝ අය කරන කුසල් විනාශ වන්නේ ඔවුන්ගේ කට ප්‍රවේසම් කර නොගැනීම නිසාය. එබැවින් මෙම පුණ්‍ය රමළාන් මාසයේදී කිසිවෙකුගේ ඕපාදුප කතාකිරීමෙන් හැකිපමනින් වැලකී සිටීමට උත්සාහ කළ යුතුය. නැතහොත් අප මහන්සියෙන් කරන කුසල් වෙනත් කෙනෙකුගේ ගිණුමට බැර වනු ඇත. ඔවුන් කරන අකුසල් අපගේ ගිණුමට බැර වනු ඇත.

විශේෂයෙන්ම රමළාන් මාසයේදී අප කරන කුසල් ක්‍රියාවලට හානි සිදුවන්නේ නොඉවසිමෙන් කටයුතු කිරීම නිසාය. අපි කුසගින්නේ සිටින විට යම්කිසි කෙනෙක් කරන සුළු සිද්ධියටත් කිපීමෙන් අපගේ බොහෝ කුසල් නැතිවී යා හැකිය. එබැවින් හැකිතරම් ඉවසීමෙන් සහ අනෙක් අයට සමාව දීමෙන් කටයුතු කිරීමට උත්සාහ කළ යුතුය. මෙම පුරුද්ධ රමළාන් මාසයේදී පමණක් නොව වෙනත් මාසවලදීද ප්‍රයෝජනවත් වනු ඇත.

අප කරන කුසල් විනාශ වන තවත් කරුණක් වන්නේ බිද්අත් ක්‍රියාවල නිරත වීමය. බොහෝ අයට නිවැරදි ආගමික දැනුම නොමැති කම නිසා නබිතුමා පෙන්වා නොදුන් අලුත් දේවල් දහම තුලට ඇතුලත් කරති. රමළාන් මාසයේදී සිදුවන ඇතැම් බිද්අත් ක්‍රියාවන් වන්නේ නියතය කටින් සද්ද නගා කීම, අළුයම් සලාතයට අසාන් කීමට විනාඩි කිහිපයකට කලින් සහර් නතර කිරීම, උපවාසය අවසාන කිරීම ප්‍රමාද කිරීම, උපවාසය අවසාන කළ පසු සාමුහික දුආ ප්‍රර්ථනා සිදු කිරීම වැනි දේවල්ය.

ඇතැම් අය කුරානය පාරයනය කරන අතරම එහි ඇති නියෝගයන් උල්ලංගනය කරති. උදාහරන වශයෙන් බොරු කීම, වංචා කිරීම, මුලා කිරීම, පොලියට ගැනීම සහ පොලියට දීම, මත්ද්‍රව්‍ය භාවිතා කිරීම පෙන්වා දිය හැකිය. මෙවැනි වැරදි කරන අය ඇත්නම් මෙම පුණ්‍ය රමළාන් මාසයේදී ඒවායින් වැලකී තව්බා කිරීමට ඔවුන් අදිටන් කර ගත යුතුය. මෙම පුණ්‍ය රමළාන් මාසයේදී එය පහසුවෙන් කළ හැක්කේ සාතන්ව බැඳ තබා ඇති නිසාය.

දැනටමත් අල්ලාහු තආලා පෙන්වා දී ඇති නිවැරදි මාර්ගයේ ගමන් කරන අය වැඩි වැඩියෙන් පින් දහම් කිරීමටත් කියාමුල් ලෙයිල් වන්දනයේ යෙදීමටත් කුරානය වැඩියෙන් පාරයනය කිරීමටත් සදකා දීමටත් අවස්ථාවක් කරගත යුතුය. මෙම මාසයේදී කරන සෑම සුන්නාවකටම ෆරල් වන්දනයක පින ලැබෙන්නේය. එබැවින් ඉන් උපරිම ප්‍රයෝජනය ලබා ගැනීමට උත්සාහ කළ යුතුය.

ලෛලතුල් කදර් නම් මාස 1000 කට වඩා උතුම් එක් රැයක් රමළාන් මාසයේ අවසාන දින දහය තුලදී සොයා ගැනීමට නබිතුමා පවසා ඇත. එම රාත්‍රිය අපේක්‍ෂාවෙන් නබිතුමා රමළාන් මාසයේ අවසාන දින දහය මස්ජිදයේ රැඳී සිට ඇත. මෙම පුණ්‍ය කර්මයේ යෙදීමෙන් අපටද එම රාත්‍රිය ලබා ගැනීමට අවස්ථාව උදාකරගත හැකිය.

By M. Fasy Ajward.B.Sc(Sp.Phy)Hons,Japura.

Leave a Reply

Your email address will not be published.