මිනිසාට වැරදි මාර්ගයෙන් නිවැරදි මාර්ගය වෙන්කොට පෙන්වීම සඳහා සිය ලක්ෂයකට වඩා නබිවරුන් පැමිණ තිබේ. ඔවුන් පවසන්නේ දෙවියන්ගේ වදන් බව සනාථ කිරීම සඳහා බොහෝ ප්‍රාතිහාරයන් සිදු කොට ඇත. ඒවා සියැසින් දුටු ඇතැම් අය නිවැරදි මාර්ගය පිළිගෙන ඇත. ඇතැම් අය ඒවා ප්‍රතික්ෂේප කොට ඇත. කෙසේ වෙතත් අද අපි සිටින්නේ විද්‍යා හා තාක්ෂනය ඉතාමත්ම දියුණු යුගයකය. ඒ අනුව දහමට අමතරව දෙවියන්ගේ මැවීම් ගැන අධ්‍යයනය කිරීමෙන් විශ්වයට ආරම්භයක් තිබෙන බවත් එම ආරම්භය ඇතිකළ එක් දෙවි කෙනෙක් පමණක් සිටිය යුතු බවත් තේරුම් ගැනීමට හැකිව තිබේ. මෙම සත්‍යය බොහෝ අය දැක දැකත් එය පිලි නොගෙන සිටීම ඔවුන්ගේ අවාසනාවකි.
“පවසනු: තමන් විසින්ම තමන්ගේ සීමාව ඉක්මවා (වැරදි කරගත්) මාගේ ගැත්තනි! නුඹලා අල්ලාහ්ගේ දයාව කෙරෙහි විශ්වාසය අත් නොහරිනු! නියතව අල්ලාහ් සියළුම පව් සමා කරන්නාය. ඇත්ත වශයෙන්ම ඔහු අධිකව ක්‍ෂමා කරන්නාද, අසම දයාවන්තයාද වේ” (කුරානය 39:53).
මිනිසා ජිවිත කාලය පුරාම දෙවියන්ව ප්‍රතික්ෂේප කරමින් සිට මරණයට පෙර විශ්වාසවන්තයෙකු බවට පත්වන්නේ නම් ඔහු එතෙක් කල් කල සියළුම පව් සමාකරණ බව නබිතුමා පැවසුවේය. තවද ඔහුගේ එම ක්‍රියාව දැක දෙවියන් අතිශයෙන්ම සතුටට පත්වන බවත් පැවසේ. කෙසේ වෙතත් මිනිසා කොපමණ කාලයක් ජිවත් වනවාදැයි කාට නම් කිව හැකිද?
මිනිසා සත්‍යයෙන් බැහැර වීමට ප්‍රධාන වශයෙන් බලපාන්නේ පාරම්පරික විශ්වාසයන්හි මුල් බැසගෙන සිටීමය. එසේම මිනිසාගේ මමත්වය සහ සාතන්ගේ බලපෑමද ඊට හේතුන් වන්නේය. මේවා හොඳින් තේරුම් ගන්නේ නම් මිනිසාට සත්‍යය තේරුම් ගැනීම එතරම් අපහසු කාර්යයක් වන්නේ නැත.
By Fasy Ajward.B.Sc(Special)Hons.