ඉමාම් තුමාණෝ කුත්බා (සිකුරාදා දින දේශන) දෙකෙහි ම මහිමාන්විත අල්ලාහ් දෙවිඳුන් ප්‍රශංසා කිරීමෙන් අනතුරුව, දේවදූත මුහම්මද් තුමාණන්ට (එතුමාණන් කෙරෙහි අල්ලාහ් දෙවිඳුන්ගේ ශාන්තිය හා සමාදානය උදා වේවා!) සලාවාත් සහ සලාම් පැවසීමෙන් පසුව, අත්-තක්වා (දේව බියබැතිමත්භාවය) ගැන අනුශාසනා කළෝය. ඉන් අනතුරුව ඔහුගේ දේශනයේ දී…
අල්ලාහ්ගේ ගැත්තෙනි,
මහිමාන්විත අල්ලාහ් දෙවිඳුන්ට බිය විය යුතු ආකාරයට බිය වන්න.
ඔබ විසින් ඉටුකරනු ලබන්නා වූ යහපත් ක්‍රියාව, එය කෙතරම් සුවිශාල යහපත් ක්‍රියාවක් වූවත් ආඩම්බර නො වන්න. එලෙස ම ඔබ විසින් ඉටුකරනු ලබන්නා වූ සුළු පාපයක් පිළිබඳ වූව ද කිසිවිටකත් සුළු කොට නො තකන්න.ඔබට පෙර විසූ උදවිය ආදර්ශයක් හැටියට අරගන්න.
උතුම් කුරානයේ සර්වබලධාරි අල්ලාහ් දෙවිඳුන් මෙලෙස ප්‍රකාශ කරයි.
එහෙයින් කවරෙකුගේ තරාදිය (යහකම්වලින්) බර වන්නේ ද, ජයග්‍රහණය ලබන්නෝ ඔවුහු ම ය.තවද කවරෙකුගේ තරාදිය (යහකම්වලින්) ඌන වන්නේ ද, ඔවුහුය තම ආත්මයට පාඩු ඇති කර ගත්තෝ. (ඔවුහු) නිරයෙහි සදාකාලිකයෝ ය.”(23 ( 102-103)
අල්ලාහ්ගේ ගැත්තෙනි, ධාර්මික මුස්ලිම්වරයෙක් සෑම විට ම තම වගකීම පිළිබඳ හැඟීමකින් සිටියි. ඔහු සෑම විට ම රටේ යහපත සහ මිනිසුන්ගේ යහපත ගැන සොයා බලයි. ඔහු මිනිසුන්ගේ අයිතිවසිකම් ආරක්ෂා කරන අතර ඔවුන් අතර යුක්තිය සාධාරණය ඉටු කරයි. ඔහුගේ ක්‍රියාවන් අවංකභාවයෙන් මෙන් ම චිත්ත පාරිශුද්ධ භාවයෙන් පවතී. එමෙන් ම ඔහු විසින් මෙලොව සම්පත් ආරක්ෂා කරනු ලැබේ.
තම වගකීම පිළිබඳ හැඟීමකින් සිටින මුස්ලිම්වරයෙක්ව සෑමවිට ම සැදැහැවත්
පුද්ගලයෙකු හැටියට දැකගැනීමට පුළුවනි.ඔහු අනෙක් අයව ද යහක්‍රියාවන් හි නියැලීම‌ට පොළඹවයි.වංචා සහ දූෂණ වළක්වයි.
මුස්ලිම්වරුනි, වංචා සහ දූෂණ මර්ධනය කිරීම සඳහා සුපරීක්ෂාකාරීව කටයුතු කිරීම සමාජ යුතුකමක් ලෙස සලකන ඉස්ලාම් දහම, එය ක්‍රියාත්මක කිරීමේ දී පුද්ගලයන්ගේ වගකීම් ගැන සඳහන් කිරීමට අමතක නො කළේය.
සෑම පුද්ගලයෙකු ම යහපත් කටයුතු සඳහා සහයෝගය දැක්විය යුතු ය. ආනිසංස බලාපොරොත්තුවෙන් සමාජය ප්‍රතිසංස්කරණ ක්‍රියාකාරකම්හි නියැලීම මහඟු පුන්‍ය කරතව්‍යකි.එමගින් ඒක පුද්ගල මෙන් ම සමාජය සංවිධාන සහ මුළු රට ම වංචාවෙන් සහ දූෂණයෙන් ආරක්ෂා වනු ඇත.
ආනිසංස බලාපොරොත්තුවෙන් සමාජ ප්‍රතිසංස්කරණ ක්‍රියාවන්හි නිරත වීමෙන් සමාජය කෙරෙහි තිබෙන අධීක්ෂණය ශක්තිමත් කරනු ඇත.සෑම ප්‍රජා වැඩසටහනක් ම ඒවා පොදු හෝ තනි පුද්ගල වැඩසටහන් වේවා, ඒවාට යහපත් මාර්ගෝපදේශ ලබා දීමෙන් ඔවුන් හික්මවිය හැක. එමගින් ආගමික සීමා සහ සංස්කෘතිය අරක්ෂා වනු ඇත.මෙමගින් යම් දෙයක් ඵලදායී ලෙස ඉටු කිරීමේ හැකියාව සමාජය තුළ වර්ධනය වේ. මෙලොව සහ පරලොව ජයග්‍රහණය ලබා ගැනීම සඳහා තනි පුද්ගල සහ සමාජ සුබසාධනයන්හි ආනිසංස මෙමගින් සහතික කරනු ලැබේ.
සැදැහැවත් සේවකයෙකුට,ධර්මිෂ්ඨ පුරවැසියෙකුට මහිමාන්විත අල්ලාහ් දෙවිඳුන් කෙරෙහි ඇති අචල විශ්වාසය නිසා සහ ඉස්ලාම් දහම පිළිබඳ තිබෙන හැඟීම නිසා ඔහු කුමක් කළත් එය ඵලදායී ලෙස ඉටු කරයි. එමෙන් ම ඔහු, ඔහු සමග සිටින පුද්ගලයන් වැරදි ක්‍රියාවන්හි නියැලෙනාවාට ප්‍රිය නො කරයි. ඒ වෙනුවට එම ධාර්මික පුරවැසියා විශේෂයෙන් ම වංචා සහ දූෂණ මැඩලීම සඳහා ක්‍රියාත්මක වන අදාළ පාර්ශ්වයට තම සහයෝගය ලබා දෙයි.
සැදැහැවතුනි, දූෂණ සහ වංචා , ඒවා තනි පුද්ගල ක්‍රියාකාරකමක් හෝ සංවිධානාත්මක ක්‍රියාකාරකම් වේවා, ඒ සියල්ලක් ම අතිශය වැරදි ක්‍රියාවන් වේ. එම ක්‍රියාවන්හි නියැලෙන්නෝ තම තමන්ගේ මඩිය සරුකරගැනීමට හෝ තම සුදුසුකම්වලින් ඔබ්බට ගිය තනතුරක් දැරීමට නින්දිත උත්සාහයක් දරති. එම උත්සාහයන් ඔවුන්ව හරාම් (අනුමත නොවන) ලාභය කරා රැගෙන යන අතර එවැනි කූට ක්‍රියාවන් නිසා සමාජ සංවිධාන සහ අනෙකුත් ආයතන දුර්වල වී කඩාකප්පල් වන්නේය යන සත්‍ය වටහා ගැනීමට ඔවුහු ප්‍රතික්ෂේප කරති.
දූෂණ සහ වංචා මගින් රටක යටිතල පහසුකම් වලට මරුපහරක් එල්ල වන අතර එමගින් රටේ වැදගත් ක්ෂේත්‍ර කෙරෙහි ද බලපෑම් ඇති විය හැකිය. දූෂණ සහ වංචා තුළින් රටක ජාතියක සම්පත් සූරාකනු ලැබේ. එමගින් රටේ මූලික පහසුකම්වලටත් බලපෑමක් එල්ල වේ. රටේ ඵලදායිතාව සුන්‍ය වන අතර ජනතා සුබසාධනය කටයුතුවල කාර්යක්ෂමතාව අඩුවේ.තවද නීතිය හා සාමය උදාසීන වේ.එබැවින් වංචා සහ දූෂණවලට එරෙහිව අපගේ නැගී සිටීම අත්‍යවශ්‍ය වේ. වංචා සහ දූෂණය මුලිනුපුටා දැමීමටත් ඒවා තුරන් කිරීමට අප සියලු දෙනා ම සහයෝගයෙන් කටයුතු කළ යුතු ය. සෑම දෙයක් ම විනිවිදභාවයෙන් නිරීක්ෂණය කරනු ලැබිය යුතු ය.එය අපව සමෘද්ධිය හා සාර්ථකත්වය කරා රැගෙන යන අතර එමගින් අපට සාමකාමී, සුරක්ෂිත සහ සාධාරණ සමාජයක් නිර්මාණය කළ හැකිය.
අල්ලාහ්ගේ ගැත්තෙනි! වංචා සහ දූෂණ ආවරණය කිරීමේ දී සහ නියාමනය සහතික කිරීමේ දී මාධ්‍යයක සතු වගකීම ද අතිශයින් ම වැදගත් වේ. ජනතාවට අසත්‍ය තොරතුරු සහ දත්ත ලබාදීම සම්බන්ධයෙන් අවධානය යොමු කළ යුතු අතර ප්‍රවෘත්ති විකාශනය කළ යුත්තේ සත්‍ය තොරතුරු අනාවරණය කිරීමෙන් සහ සනාථ වීමෙන් පසුව ය.එමෙන් ම මාධ්‍යක් යම් පාර්ශවයකට පක්ෂපාතීව ක්‍රියා නොකර මාධ්‍ය ආචාරධර්ම පදනම් කරගෙන යුක්තිය සහ සද්ධර්මය රකිමින් අවංකභාවයෙන් කටයුතු කළ යුතු ය. වැරදි නිවැරදි කිරීමට මාධ්‍ය තුළින් ලබා දෙන්නා වූ දායකත්වය ඉතාමත් ප්‍රශංසනීය වන අතර යහක්‍රියා කළ උදවිය ගෞරවයට පාත්‍ර කිරීම කෙරෙහි ද මාධ්‍ය අවධානය යොමු කළ යුතු ය.
හිතවත් ජනතාවනි! වංචාව සහ දූෂණය මර්ධණය කිරීමේ ක්‍රමවේදය නගා සිටුවීම සඳහා අපගේ (සෞදි) රට ගෙන ඇති තීරණාත්මක පියවර සහ සූක්ෂම ලෙස යොදා ඇති අධීක්ෂණ ක්‍රියාමාර්ග අගය කළ යුතු අතර වැරදිකරුවන්ට අපක්ෂපාතී ලෙස දඩුවම් ලබා දීම ද අගය කළ යුතු ය. විශේෂයෙන් ම වංචාවට සම්බන්ධ අය, ඔවුන් කුමන තරාතිරමක සිටිය ද කුමන ආකාරයේ වංචාවන් සිදු කළ ද එය සුළු හෝ මහා පරිමාණ වංචා වේවා, ඒ සියල්ල විනිවිදව හෙළිදරව් කිරීම සැබැවින් ම අගය කළ යුතු කරුණකි. වංචාව සහ දූෂණ නිරීක්ෂණය කර නිසි ක්‍රියාමාර්ග ගැනීමෙන් කෙටි කාලයක් තුළ වංචාව සහ දූෂණ විශාල ලෙස අඩු වී ඇත.මෙමගින් එම ක්‍රියාවන් කිරීමට පෙළඹෙන්නෝ ප්‍රවේශම් වෙති,රටක් වින කටින මෙම ක්‍රියාවන් වලට සමාවක් නැති බව සෑම කෙනෙකුගේ ම සිත් තුළ කාවැදී ඇත. අල්හම්දුලිල්ලාහ්(සියලු ප්‍රශංසා මහිමාන්විත අල්ලාහ් දෙවිඳුන්ට ය.) අපගේ වගකිවයුතු පුද්ගලයින්ට මෙම යුතුකම ඉටු කිරීමට අල්ලාහ් දෙවිඳාණෝ ශක්තිය ධෛර්යය ලබාදේවා!
සර්වබලධාරී අල්ලාහ් දෙවිඳාණෝ අප සියලු දෙනා ම, අල්ලාහ්ට බිය වන, වංචාවෙන් සහ ඊට සහයෝගය ලබාදෙන කටයුතු කිරීමෙන් වැළකී සිටින යහපත් මිනිසුන් බවට පත් කරත්වා! උන්වහන්සේ විසින් නියම කරන ලද සීමා මායිම් අනුගමනය කරන දැහැමි මිනිසුන් ලෙස ජීවත් වීමට කරුණාව ලබාදෙත්වා! ආමින්.
අපගේ දේවදූත මුහම්මද් තුමාණන්ට අධික ලෙස සලවාත් සහ සලාම් පවසමු.
උතුම් මක්කම නුවර මස්ජිදුල් හරාම් හි හිජ්රි වර්ෂ 15-05-1444 (ක්‍රි.ව 09-12-2022) දින පවත්වනු ලැබූ කුත්බා (සිකුරාදා දින දේශනයෙහි) සංක්ෂිප්ත සිංහල අනුවාදය.
——————————-
ධර්ම දේශනය සිදුකළේ, මහාචාර්ය අෂ් ෂේක් සාලිහ් බින් අබ්දිල්ලාහ් බින් හුමෛද් තුමාණන් විසිනි.
——————————-
සිංහලෙන්: Ash-sheikh Al-Hafil Nasik Farook Madani (BA (Hons) in Arabic Language, KSA |MA |MPhil Reading in Pali and Buddhist studies at the University of Kelaniya