ඉස්ලාමයේ ආරම්භයේ සිටම නබිතුමා ඇතුළු ඔහුගේ අනුගාමිකයින් නොයෙකුත් කටුක අත්දැකීම් වලට මුහුණ පා තිබේ. ඒ අනුව පරීක්ෂාවන්ට මුහුණ දීම මුස්ලිම්වරුන්ට අළුත් අත්දැකීමක් වන්නේ නැත. මුස්ලිම්වරුන් වශයෙන් යම් පරීක්ෂාවන්ට මුහුණ දුන් විට කල යුත්තේ තමන්ගේ වැරදි ඇතොත් ඒවා නිවැරදි කර ගනිමින් අල්ලාහ්ට වඩාත් ලං වීමට උත්සාහ කිරීම ය. විශේෂයෙන්ම නවීන සමාජයේ බොහෝ අය සලාතය නිසි පරිදි ඉටු කරන්නේ නැත. එබැවින් ඔවුන් කල යුත්තේ මින් ඉදිරියට තමන්ට අනිවාර්ය කොට ඇති සලාතය නිසි ලෙස ඉටු කිරීම තුලින් ආදර්ශමත් මුස්ලිම් වරයෙකු වීමය. එපමණක් නොව බොහෝ ව්‍යාපාරිකයින් ඉස්ලාම් දහමින් තහනම් කොට ඇති පොලිය හා සම්බන්ද වී තිබේ. ඔවුන් කළ යුත්තේ එම වැරදි වලින් ඉවත්වී තමන් කළ වැරදි වලට පසුතැවිලි වී තමන් කල වැරදි වලින් මිදීමය. තවද මෙම වැරදි කෙනෙක්ව අල්ලාහ්ගෙන් ඈත් කර තැබීමට හේතුවන ප්‍රධාන කරුණු බව වටහා ගත යුතුය.
අල් කුරානයට අනුව කිසිම ජීවියෙකුගේ අවශ්‍යතාවයන් මැවීමෙන් තොරව එම ජීවියා මවා නොමැත. තවද අල්ලාහ් කෙරෙහි බිය බැතිකම ඇති අයට ඔවුන් නොසිතන අයුරින් සිය දෛනික අවශ්‍යතාවයන් ලබා දෙන බව කුරානයේ සඳහන් වේ. මේ නිසා කිසිවෙකු තම දෛනික අවශ්‍යතා සම්බන්දයෙන් බිය විය යුතු නැත. බිය වනවා නම් විය විය යුත්තේ අල්ලාහ්ගේ නියෝග කඩ කිරීම පිළිබඳව පමණි.
ලෞකික ජීවිතය ඇත්තේ මරණයෙන් පසු ජීවිතය විශ්වාස නොකරන උදවිය සඳහාය. එබැවින් කිසිම මුස්ලිම්වරයෙකු ලෞකික දේවල් අත්කර ගැනීම සඳහා තරඟ වැදිය යුතු නැත. ලෞකික දේවල් අවම තරිමින් තිබෙන තැනැත්තා වැඩිම මානසික සුවයෙන් තම අරමුණ කරා යොමු වනු ඇත. එම නිසා තම මතු ජීවිතයට ප්‍රමුඛ ස්ථානයක් දෙමින් සෑම දෙයක්ම කල යුතුය. එසේ කරන විට අපි කිසිවෙකුගේ එදිරිවාදිකම් වලට ගොදුරක් නොවනු ඇත.
By Fasy Ajward.B.Sc(Special)Hons.