මුස්ලිම්වරයෙකු යනු අල්ලාහ්ගේ කැමැත්තට සම්පුර්ණයෙන්ම යටත් වූ කෙනාය. මේ නිසා මුස්ලිම්වරයෙකු අල්ලාහ්ගේ අණ පිළිපදිමින් ඔහුට කෘත ගුණ දක්වමින් සියළු දෙනා අතර සාමය ඇති කිරීමට කටයුතු කළ යුතුය. කළහය ඇතිකරන තැනැත්තන්ව අල්ලාහ් ප්‍රිය කරන්නේ නැත. අල් කුරානයේ බොහෝ තැන්වල ඒ බව සඳහන් කොට ඇත. ඒ අනුව මුස්ලිම්වරයෙකු යැයි කියමින් භුමියේ කලහය ඇති කරන්නා අල්ලාහ්ගේ කෝපයට පාත්‍ර වනු ඇත.
මුස්ලිම්වරයෙකු තවත් කෙනෙකු හමුවූ විට ‘අස්සලාමු අලෛකුම්’ එනම් ‘ඔබට ශාන්තිය අත්වේවා’ යැයි පවසන්නේය. මෙය වචනයට පමණක් සිමා නොවී සිතින්ම කල යුතු කාර්‍යයකි. ඇත්තෙන්ම එසේ කරන කෙනෙකුගෙන් තවත් කෙනෙකුට හානියක් සිදු විය නොහැකිය. ඇයිද යත් අනුන්ට හිංසා කරන තැනැත්තා මාගේ අනුගාමිකයෙක් නොවේ යැයි නබි තුමා පවසා ඇති නිසාය.
මුස්ලිම්වරයෙකු අල්ලාහ්ගේ අණ පිළිපදිමින් නබිතුමාගේ ජිවිතාදර්ශය අනුගමනය කල යුතුය. ඊට ලැබෙන කුලිය සවර්ගය වේ. එහෙත් මුස්ලිම්වරුන් එලෙස ක්‍රියා කිරීමේදී මුස්ලිම් නොවන ඇතැම් අයගේ දෝස දර්ශනයට ලක් වන්නේය. උදාහරණයක් ලෙස මුස්ලිම් කාන්තාවන් තම අලංකාරය තම ලේ ඥාතින් හැර අන් පිටස්තර අයට සඟවා ගත යුතුය. එහෙත් මුස්ලිම් නොවන ඇතැම් සුළු පිරිසකට එම ක්‍රියාව ඉවසා ගත නොහැකිය. කෙසේ වෙතත් යම් මුස්ලිම් කාන්තාවක් එවැනි අවස්ථාවකදී බාදක මැද්දේ වුවද දහම අනුව ක්‍රියා කරන්නේ නම් අල්ලාහ්ගේ කරුණාවට ඔවුන්ට ලැබෙනු ඇත.
මුස්ලිම්වරුන්ට පොලිය සහමුලින්ම තහනම් කොට ඇත. තවද පොලියට සම්බන්ද වීම අල්ලාහ් සහ ඔහුගේ දුතයානන් සමග සටන් වැදීමට සමාන කොට ඇත. එබැවින් කිසිම මුස්ලිම්වරයෙකුට පොලිය සම්බන්ද ගනු දෙනු කල නොහැකිය. යම් කිසි කෙනෙක් එසේ කරන්නේ නම් ඔහු දහමට පටහැනිව ක්‍රියා කරන්නෙකු වන්නේය. මේ නිසා මුස්ලිම්වරුන්ගේ මුල්‍යමය ගනු දෙනු සිදු කර ගැනීම සඳහා පොලී රහිත බැංකු ක්‍රමයක් තිබිය යුතුය. ඒ අනුව මුස්ලිම්වරුන් ගේ ආගමික අවශ්‍යතාවයක් සඳහා ඇතිකර ගන්නාවූ එවැනි ආයතනයකට ඇතැමුන් බදා කිරීම වරදකි.
අල් කුරානයේ වාක්‍යයන් 6000 කට වඩා තිබේ. ඉන් 99% ක් පමණ ඇත්තේ මිනිසාගේ යහ පැවැත්මට අවශ්‍ය කරුණු ය. ඒ අතර යුද්ධය සම්බන්ද වැකි කිහිපයක්ද ඇත. එම වැකිවලින් කෙරෙන්නේ ස්ථිර සාමය වෙනුවෙන් සතුරන් සමග සටන් කිරීම සම්බන්දවයි. එහෙත් ඇතැම් අය ඒවාට සන්දර්භයෙන් පිට කරුණු ඉදිරිපත් කරමින් සම්පුර්ණ කුරානයම විවේචනය කිරීම බලවත් වරදකි. ඉන් සිදු වන්නේ මිනිසුන් අතර බෙදීමක් ඇති වීම පමණි.
සම්පුර්න කුරානයම එහි විවරණයත් සමග හැදෑරීමෙන් එහි සත්‍යතාවය වටහා ගැනීමට හැකි වනු ඇත. එවිට එය මිනිස් නිර්මාණයක් නොවන බව පැහැදිලි වනු ඇත. කෙසේ වෙතත් බොහෝ අය කුරානය විවේචනය කරන්නේ එය නිවැරදිව හැදෑරීමකින් නොවේ. තවද කුරානය විවේචනය කරන බොහෝ අයට අරාබි භාෂාව පවා දන්නේ නැත. එසේ තිබියදී ඔවුන් කුරානය විවේචනය කරන්නේ කෙසේද?
Fasy Ajward, B.Sc(Sp.Phy)Hons.J.Pura.