I. “මුහම්මද් තුමාණන් වරෙක මෙසේ පවසා සිටියහ, ස්ත්‍රියක් ව විවාහ කර ගැනීම කරුණු හතරක් මත සිදු කෙරේ. ඇගේ ධනය, ඇගේ පවුල් වංශවත්කම, ඇගේ රුපාලංකාරය, ඇහේ දහම (දැහැමිකම). මෙයින් ඔබ විවාහ විය යුත්තේ දැහැමි ස්ත්‍රියක් සමගය. එසේ නොවුවහොත් ඔබ අසාර්ථක විය හැක”. (බුහාරි 4802, මුස්ලිම් 1466)
II. තමන්ට සුදුසු නොවන අයෙකු බව වැටහේ නම් එම විවාහ කටයුත්ත සඳහා ඔබගේ අනුමැතිය ලබා දීමෙන් වැළකී සිටින්න. එසේ නොවුවහොත් ඔබ විසින්ම අසාර්ථකත්වය සඳහා ආරාධනා කළා වන්නකි සිදුවන්නේ. කිසිවෙකුගේ බලපෑම් මත තීරණ ගන්නවාට වඩා තමන් විසින් ම ඉතා බුද්ධිමත් අයුරින් කරුණු සොයා බලා නිගමනයකට ඒමයි වඩාත් සුදුසු යන්න ගැන සැකයක් නොමැත. මේ සම්බන්ධව දෙමව්පියන් හා වැඩිහිටියන්ගේ අදහස් වලටද සවන්දීම වැදගත් වනු ඇත.
III. ඉහත නබි වදනින් සඳහන් කොට ඇති පරිදි දැහැමිකම සඳහා අනිවාර්යයෙන්ම ප්‍රමුඛතාව ලබා දී අනෙකුත් කරුණු තුනම හෝ ඉන් කිහිපයක් සම්බන්ධයෙන් ද අවධානය යොමු කිරීම පිළිබඳව සිතා බලන්න.
IV. ඉස්ලාමය විවිධත්වය අගය කරයි. අප සැමවිට සමාන සමාජ ආර්ථික පසුබිමකින් යුක්ත වුවන් මෙන්ම එකම වාර්ගිකත්වයෙන් යුක්ත වුවන් පමණක් විවාහ වීම බහුත්වයකින් යුත් උම්මතයක් බිහිවීමට ඇති බාධාවක් වනු ඇත. බහුත්වය හොඳ දෙයක් වුවත් එහිදීත් තමන්ගේ කැමැත්ත කෙරෙහි ද අවධානය යොමු කරන්න.
V. ඇතැම් විට ඇතැම් අය ආගමිකත්වය පිළිබඳ රඟපෑම් කළ හැක. විවාහයක් තීන්දු කර ගැනීම සඳහා ආගමිකත්වය ඉතා වැදගත් සාධකයක් බව හැමෝම දන්නා කරුණකි. එහෙයින් පෘෂ්ඨය මතු පිටට පෙනෙන දැයින් ඔබ්බට කරුණු සොයා බැලීමක් කරන්නේ නම් වඩාත් යෝග්‍යය වනු ඇත.
විවාහයක් තීන්දු කර ගැනීමේ දී ඔබට අවශ්‍ය හා සුදුසු පරිදි කාලය උපයෝගී කරගන්න. මෙම කාලය තුල හැකි පමණ අවබෝධයක් ලබා ගැනීමට කටයුතු කරන්න. විවාහය පිළිබඳ හදිසි තීරණ බොහෝ විට හානිකර විය හැක.