චෝදනාව: අල් කුර්ආන් 48:19
පළමුව සුපුරුදු පරිදි ඉස්ලාම් විවේචකයින් විවින් විකෘති කොට ඉහත අල් කුර්ආන් වැකිය ඉදිරිපත් කොට ඇති ආකාරය වෙත අවධානය යොමු කරමු.
“තවද මුස්ලිම්වරුන් විසින් මුස්ලිම් නොවන සමාජයන් විනාශ කරමින් ඔවුන්ගේ වස්තුව දේපල සහ සම්පත් සියල්ල විශාල ප්‍රමාණයන්ගෙන් අත්පත් කර ගන්නේය. එබැවින් අල්ලාහ් සැමදා මහා බලගතුය, මහා ප්‍රඥාවන්තයාය”
විග්‍රහය: සුපුරුදු පරිදි මෙහි වඩා නිවැරදි සිංහල අර්ථ දැක්වීම වෙත අවධානය යොමු කරමු.
“(එම) විශාල ප්‍රමාණයක යුද්ධාජිද වස්තූන්ද ඔවුන්ට අත්පත් කර ගන්නට සැලැස්සුවේය. අල්ලාහ් (සියල්ලන්ටම වඩා) ශ්‍රේෂ්ඨයෙකු හා ඥානවන්තයෙකු වශයෙන් සිටින්නේය”. (අල් කුර්ආන් 48:19)
මෙහිදීත් මුස්ලිම් ප්‍රජාව වෙත මුස්ලිම් නොවන සමාජයේ වෛරය උද්දීපනය කිරීම සඳහා මෙම වැකිය විකෘති කොට ඉදිරිපත් කර ඇති ආකාරය සැමට පැහැදිලිව දැකිය හැක්කකි. මෙම වැකිය පහළවන්නේ මුහම්මද් තුමාණන් හා පිරිස ආගමික වතාවත් සඳහා මක්කාවට පිටත්ව ගිය අවස්ථාවේ හුදෛබියා නම් ස්ථානයේදී මක්කාහ් කුරෛෂ් නායකයින් විසින් වළක්වා මුස්ලිම්වරුන්ට ඉතා අවාසිදායක් ලෙස පෙනෙන්නට තිබු ගිවිසුමකට එකඟවී අත්සන් තබා මදීනා නගරයට ආපසු එමින් සිටි අවස්ථාවේය. ආපසු එමෙන් පසු සිදු කළ කෛබර් යුද මෙහෙයුම මෙම වැකියේ සන්දර්භයෙන් විග්‍රහවේ. එහෙයින් නිවැරදි අවබෝධයක් ලබා ගැනීම පිණිස මෙම වැකියේ සන්ධර්භය වැදගත් වෙයි.
“එම ගස යට ඔබ වෙත (අත දී) පොරොන්දු දුන් විශ්වාසවන්තයින් (හුදෛබියා ගිවිසුම අත්සන් කළ අවස්ථාවේ සිටි පිරිස) ගැන නියත වශයෙන්ම අල්ලාහ් සෑහීමට පත් වූවේය. ඔවුන්ගේ හෘදයන්හි (සත්‍යය වූ පරිත්‍යාගශීලී අදහස ගැන) හොඳින් දැන, (ශාන්තිය හා) මනසට සැහැල්ලූවද ඔවුන් කෙරෙහි පහළ කළේය. ඉක්මන් ජයග්‍රහණයද (කයිබර් නමැති ස්ථානයේදී) ඔවුන්ට (පරිත්‍යාගයක් වශයෙන්) ලබා දුන්නේය”. (48:18)
“(එම) විශාල ප්‍රමාණයක යුද්ධාජිද වස්තූන්ද ඔවුන්ට අත්පත් කර ගන්නට සැලැස්සුවේය. අල්ලාහ් (සියල්ලන්ටම වඩා) ශ්‍රේෂ්ඨයෙකු හා ඥානවන්තයෙකු වශයෙන් සිටින්නේය”. (48:19)
“විශාල ප්‍රමාණයක යුද්ධාජිද වස්තූන් ඔබ අත්පත් කර ගන්නෙහුය යයි අල්ලාහ් ඔබට පොරොන්දු දී තිබුණි. මෙය ඔබට ඉතා ඉක්මනින් ලබා දුන්නේය. (ඔබට සතුරන් වන එම) මිනිසුන්ගේ අත්ද ඔබගෙන් ඈත් කර වළක්වා හැරියේය. (මෙය) විශ්වාසවන්තයින්ට එක් සාධකයක් බවට පත් කිරීම සඳහාද, ඔබව ඍජු මාර්ගයෙහි යාමට සැලැස්වීම සඳහාද, (මෙසේ දයාව පහළ කළේය)”. (48:20)
යුද ගැටුමකදී සතුරා අතහැර යන භාණ්ඩ යුද්ධජ වස්තූන් ලෙස හැඳින් වේ. මෙය අත්කර ගැනීම ඉස්ලාමය අනුමත කොට ඇත. මෙය ලොව ඕනෑම යුද ගැටුමක දී සිදුවන්නකි. පසුගිය කාලවකවානුවේ කොටි ත්‍රස්තවාදීන් සමග කළ සටන් වලදී ත්‍රස්තවාදීන් විසින් අතහැර ගිය සියල්ල අපගේ වීරෝධාර හමුදාව අත්පත් කරගත් බව අප සැවොම දන්නා කරුණකි.
ඉහත 48:18 වැනි වැකියේ කෛබර් යුද්ධය ගැන සඳහන් වේ. එම යුද්ධයෙන් ජයග්‍රාහි මුස්ලිම් හමුදාවට ලැබුණු යුද්ධජ වස්තුන් පිළිබඳවයි 48:19 වැකියෙහි සඳහන් වන්නේ. එම වැකිය ඉතා වංචනික අයුරින් විකෘති කොට මෙය මුස්ලිම් නොවන්නන්ගේ සම්පත් හා වස්තුන් කොල්ල කා ගැනීමට මුස්ලිම් වරුන්ට ලබා දී ඇති විශ්වීය උපයෝගීතාවක් ඇති සැමදා සැමවිට ක්‍රියාත්මක කළ යුතු සංකල්පයක් ලෙස දැක්වීම කෙතරම් කපටි හා අශෝභන ක්‍රියාවක් දැයි අසන්නට කැමැත්තෙමු. නැවත වාරයක් පහත සඳහන් අල් කුර්ආන් වැකිය කෙරෙහි ඔබගේ අවධානය යොමු කරවන්නට කැමැත්තෙමු.
“නුඹලා අතර අසාධාරණ අන්දමින් නුඹලා එකිනෙකාගේ වස්තුව අනුභව නොකරවූ. තවද නුඹලා දැනුවත්ව ම ජනයාගේ වස්තුවෙන් කොටසක් පාපකාරී අයුරින් අනුභව කිරීම පිණිස බලධාරීන් වෙත ඒවා (වස්තුවෙන් කොටසක් අල්ලස් වශයෙන්) නොයවවූ”. (අල් කුර්ආන් 2 : 188)
බොරුව, වංචාව හා මුලාව පදනම් කරගනිමින් මෙලෙස ජනයා නොමඟ යවන්නට කටයුතු කිරීම පිළිබඳ ව සත්‍යවශයෙන් ම දහමක් නියෝජනය කරන්නා වූ සංවිධානයක් ලෙස එය කෙතරම් නොහොබිනා කටයුත්තක් දැයි විමසා සිටින්නට කැමැත්තෙමු.
ඊළඟ චෝදනාවෙන් ඉදිරිපත් කොට තිබුණේ මෙමෙ පරිච්ඡේදයේ 48:20 වැකිය පිළිබඳවය. ඔබ එම වැකිය ඉදිරිපත් කොට තිබුණේ පහත සඳහන් ලෙසට ය.
චෝදනාව: අල් කුර්ආන් 48:20
“මුස්ලිම් නොවන සමාජයන් සතු වස්තුව සහ ඔවුන්ගේ සියලු දේපල මුස්ලිම්වරුන් විසින් කොල්ල කා අත්පත් කර ගැනීම සඳහා ඉඩ සලසන බව අල්ලාහ් ඔබට (මුස්ලිම්වරුන්ට) පොරොන්දු වී ඇති අතර, අල්ලාහ් ඔබ වෙනුවෙන් එම අවස්ථාව ඉක්මන් කරනු ලබයි. තවද, ඔබලාට එරෙහිව කිසිවක් කළ නොහැකි වන ලෙස, ඔහු විසින් ඔබට විරුද්ධ මිනිසුන් ප්‍රතිබාධනය කොට ඇත. එබැවින්, එය අල්ලාහ් විසින් මුස්ලිම්වරුන්ව සෘජු මාර්ගයේ මඟපෙන්වන බවට වූ සංඥාවක් / නිමිත්තක් සේ සලකන්න”.
මෙහිදීත් ඔබගේ සුපුරුදු විකෘති කිරීම ඉතා ලාබාල අයුරින් ම කර ඇති බව දැකිය හැක. මෙම වැකියේ නිවැරදි අර්ථකථනය හා එහි පසු වැකියන් ඇතුළු සන්දර්භය පහතින් දක්වා ඇත්තෙමු.
“විශාල ප්‍රමාණයක යුද්ධාජිද වස්තූන් ඔබ අත්පත් කර ගන්නෙහුය යයි අල්ලාහ් ඔබට පොරොන්දු දී තිබුණි. මෙය (කෛබර් යුද්ධයෙන්) ඔබට ඉතා ඉක්මනින් ලබා දුන්නේය. (ඔබට සතුරන් වන එම) මිනිසුන්ගේ අත්ද ඔබගෙන් ඈත් කර වළක්වා හැරියේය. (මෙය) විශ්වාසවන්තයින්ට එක් සාධකයක් බවට පත් කිරීම සඳහාද, ඔබව ඍජු මාර්ගයෙහි යාමට සැලැස්වීම සඳහාද, (මෙසේ දයාව පහළ කළේය)”. (48:20)
“(පර්ශියාව, රෝමය ආදී දේශයන්හි ඔබට) තවත් ජයග්‍රහණයක් (ඇත්තේය). එයට ඔබ (තවමත්) සුදුස්සන් බවට පත් වූවේ නැත. එහෙත් අල්ලාහ් එය වට කරගෙන සිටින්නේය. අල්ලාහ් සියල්ල කෙරෙහි බලසම්පන්නයෙකු වශයෙන්ම සිටින්නේය”. (48:21)
“ප්‍රතික්ෂේප කරන්නන් (මේ අවස්ථාවේදී) ඔබ සමග යුද්ධ කරන්නෙහු නම්, ඔවුන්ම පසුපස හරවා දුවනු ඇත. පසුව ඔවුන් (තමන්ව) බේරා ගන්නෙකු හෝ උදව් කරන්නෙකු හෝ යන කිසිවෙකුත් නොදකින්නාහ”. (48:22)
48:20 වැනි වැකියෙන් අනාගත ජයග්‍රණයන් හා එහිදී මුස්ලිම් හමුදාව ලබාගන්නා වූ විශාල ප්‍රමාණයක් වූ යුද්ධජ වස්තුන් ගැන සඳහන් වේ. එයට පසු වැකියන් ද එම කරුණම විග්‍රහ කර දක්වයි. නැවත වරක් මෙය මුස්ලිම් නොවන ඕනෑම අයෙකුගේ සම්පත් ලබා ගැනීම සඳහා දී ඇති විවෘත බලපත්‍රයක් හැටියට හුවා දැක්වීමට දරා ඇති හෝඩියේ පන්තියට තරම් වත් නොවටිනා උත්සාහය ඉතා ලාමකය, බොළඳය. ඉස්ලාමයට එරෙහි ව චෝදනා නගන්නන්ගේ චින්තනය යොමු කළ යුතු වැදගත් කරුණක් මෙම වැකියේ අන්තර්ගත වී ඇත. ඔබ ඉතා පරපීඩක වින්දනයක් ලබමින් හාස්‍යයට ලක්කරන්නට කටයුතු කොට ඇති අල් කුර්ආනයේ මෙවැනි අනාවැකි බොහොමයක් දක්නට ඇත. 48:20 වැකිය අදාළ වන්නේ රෝම අධිරාජ්‍යයේ කොටසක් හා පර්සියන් අධිරාජ්‍ය පිළිබඳ වූ අනාගත ජයග්‍රහණයන් පිළිබඳ ව ය. ඓතිහාසික සාක්ෂි අනුව මෙම අනාවැකි එලෙසම සිදු වී මුස්ලිම්වරුන්ට අති විශාල ජයග්‍රහණයන් හා යුද්ධජ සම්පත් විශාල ප්‍රමාණයක් අත්කර ගැනීමට අවස්ථාව සලසා දුන්නේය. අනෙකුත් අල් කුර්ආනයේ අනාවැකි පිළිබඳ වැකි ලැයිස්තුගත කොට ඒවා සත්‍යය වශයෙන් ම ඉටුවූ බවට ඇති ඓතිහාසික සාක්ෂි ඔබගේ විචාරාත්මක චින්තනය උදෙසා අපට ඉදිරිපත් කළ හැක.
අල් කුර්ආනය මිත්‍යා ප්‍රබන්ධයක් නම් එය එසේ සිදුවිය හැක්කේ කෙසේ ද කියා කරුණාකර මොහොතක් සිතා බලන ලෙස ඉල්ලා සිටින්නට කැමැත්තෙමු. එහෙයින් නිවැරදි අවබෝධයෙන් යුක්තව අල් කුර්ආනය දෙස අවධානය යොමු කරන ලෙස ගෞරවයෙන් හා කාරුණිකව ඉල්ලා සිටින්නෙමු.
By: එම්.අහ්මද් දහ්ලාන්
www.yayuthumaga.com